Bâd-ı sabâ bundan doğru cânâna
Arzıhal ile vardın ne didi
Ne incinmiş aceb bu ben nâlâna
Dokunup lebinden sordun ne didi
Ben niyaz eyledim ictînab itti
Ne lûtf ile güldü ne hitab itti
Ben gittim sen kaldın ne cevap itti
Güftârın işidüp gördün ne didi
Medh ü senasını eyleyüp zahir
Her an idüp tel tel o zülfü kâfir
Sergüzeştnâmemi okuyup vâfir
El bağlayup divâna durdun ne didi
Câmeni çâk idüp girîbânından
Niyazlar iderdin geçüp yanından
Çin seherde hüsn-i gülistanından
Yâsemenler güller derdin ne didi
Kulundur neyleyim bir duâ idüp
Dest açup niyaza bir sena idüp
Garib Gevheri’yi bir rica idüp
Hâkipâye yüzün sürdün ne didi…>>